هناك

كتبت كتير عشان افهم وابطّل اخاف من العالم
وإجاباتي تلاقيني فابطّل اضيع من الأحباب
عرفت الحب كم مرة وجاب أجلي، بقيت أحذر
عشان جلدي ماهوش فاضل فيه بيت لندوب

لا أبات مغلوب ولا غالب، افضّل يوم ما انام ارتاح
ولما امشي أمدّ الخطو، ماعيش تمن إني أتذكّر
باطوف مرة واطوف تاني، وكم مرة طريقي ضل
واعيد الكرّة من تاني، على أمل إني يوم اوصل

باكاد اعملها أحيانًا، وباخطف حلم كان أبعد
وباخلق أرض ما أعرفهاش، ما تخطرتش الخيال لحظة
لا بكرة فيها ولا ذكرى ولا ماضي ولا أوهام
ولا حدود للزمن، أو وداع..

هناك الحب مدى الأحلام، هناك الروح ما بتهابشِ
حياة أو موت، ولا بتندم على اللي راح،
هناك ترسي مراكبنا، وارجع أحبّ من تاني
وابطّل اخاف من العالم وابطّل اضيع من الأحباب

رفيق محفوظ